ਦਾਖਾ ਪਾਰਕ ਤੋਂ ਸ਼ੁਰੂ ਹੋਏ ਟਰੈਕਟਰ ਮਾਰਚ ਨੇ ਸਰਕਾਰ ਦੀ ਨੀਂਦ ਉੜਾਈ
ਮੁੱਲਾਂਪੁਰ: ਲੈਂਡ ਪੂਲਿੰਗ ਨੀਤੀ ਦੇ ਖ਼ਿਲਾਫ਼ ਸੰਯੁਕਤ ਮੋਰਚੇ ਦੇ ਸੱਦੇ ’ਤੇ ਅੱਜ ਹਜ਼ਾਰਾਂ ਟਰੈਕਟਰਾਂ ਤੋਂ ਇਲਾਵਾ ਕਾਰਾਂ ਜੀਪਾਂ, ਸਕੂਟਰ ਮੋਟਰਸਾਈਕਲ ਦੇ ਨਾਲ ਕਿਸਾਨਾਂ ਨੇ ਵੱਡਾ ਰੋਸ ਮੁਜ਼ਹਾਰਾ ਕੀਤਾ ਗਿਆ। ਰੋਸ ਮੁਜ਼ਹਾਰੇ ਵਿੱਚ ਨੌਜਵਾਨਾਂ ਦੀ ਵੱਡੀ ਗਿਣਤੀ ਦੇ ਨਾਲ ਨਾਲ ਵੱਡੀ ਗਿਣਤੀ ਵਿੱਚ ਬੀਬੀਆਂ ਨੇ ਵੀ ਹਾਜ਼ਰੀ ਭਰੀ। ਰੋਸ ਮੁਜ਼ਾਹਰੇ ਵਿੱਚ ਵਹੀਕਲਾਂ ਦੀ ਲੰਬਾਈ ਕਈ ਪਿੰਡਾਂ ਤੱਕ ਸੀ। ਰੋਸ ਮੁਜ਼ਾਰਾ ਦਾਖਾ, ਕੈਲਪੁਰ, ਚੱਕ ਭੱਟੀਆਂ, ਚੰਗਣਾ ਤੋਂ ਹੁੰਦਾ ਹੋਇਆ ਨੂਰਪੁਰ ਬੇਟ, ਬੱਗੇ ਕਲਾਂ, ਮਲਕਪੁਰ, ਬੀਰਮੀ, ਬਸੈਮੀ, ਈਸੇਵਾਲ ਤੋਂ ਹੁੰਦਾ ਹੋਇਆ ਦਾਖਾ ਵਿਖੇ ਸਮਾਪਤ ਹੋਇਆ।
ਸੰਯੁਕਤ ਮੋਰਚੇ ਨਾਲ ਸੰਬੰਧਿਤ ਜਥੇਬੰਦੀਆਂ ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਉਗਰਾਹਾ, ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਡਕੌਂਦਾ ਧਨੇਰ, ਜਮਹੂਰੀ ਕਿਸਾਨ ਸਭਾ, ਪੰਜਾਬ ਆਲ ਇੰਡੀਆ ਕਿਸਾਨ ਸਭਾ 1936, ਭਾਰਤੀ ਕਿਸਾਨ ਯੂਨੀਅਨ ਰਾਜੇਵਾਲ, ਭਾਰਤੀ ਕਿਸਾਨ ਯੂਨੀਅਨ ਏਕਤਾ ਡਕੌਂਦਾ ਬੁਰਜ ਗਿੱਲ ਦੇ ਆਗੂਆਂ ਨੇ ਤਿੱਖੀ ਸੁਰ ਵਿੱਚ ਸੂਬਾ ਸਰਕਾਰ ’ਤੇ ਹਮਲੇ ਬੋਲਦਿਆਂ ਕਿਹਾ ਕਿ ਜੇਕਰ ਸਰਕਾਰ ਨੇ ਆਪਣੀ ਇਹ ਨੀਤੀ ਨਾ ਬਦਲੀ ਤਾਂ ਆਉਣ ਵਾਲੇ ਸਮੇਂ ਦੌਰਾਨ ਵੱਡਾ ਸੰਘਰਸ਼ ਵਿੱਢ ਕੇ ਸਰਕਾਰ ਦੀਆਂ ਅੱਜ ਵਾਂਗ ਜੜਾਂ ਹਿਲਾ ਦਿੱਤੀਆਂ ਜਾਣਗੀਆ। ਰੋਸ ਮਾਰਚ ਵਿੱਚ ਕਿਸਾਨ ਜਥੇਬੰਦੀਆਂ ਦੇ ਨਾਲ ਨਾਲ ਮਜ਼ਦੂਰ ਜਥੇਬੰਦੀਆਂ ਪੇਂਡੂ ਮਜ਼ਦੂਰ ਯੂਨੀਅਨ ਅਤੇ ਦਿਹਾਤੀ ਮਜ਼ਦੂਰ ਸਭਾ ਸਮੇਤ ਹੋਰ ਮਜ਼ਦੂਰ ਜਥੇਬੰਦੀਆਂ ਵੱਲੋਂ ਵੱਡੀ ਸ਼ਮੂਲੀਅਤ ਕੀਤੀ।
ਜਥੇਬੰਦੀਆਂ ਦੇ ਆਗੂਆਂ ਵਿੱਚ ਝੰਡਾ ਸਿੰਘ ਜੇਠੂ ਕੇ, ਜਸਵੰਤ ਸਿੰਘ ਭੱਟੀਆਂ, ਬਲਰਾਜ ਸਿੰਘ ਕੋਟ ਉਮਰਾ, ਮਾਸਟਰ ਗੁਰਮੇਲ ਸਿੰਘ ਰੂਮੀ, ਸਤਨਾਮ ਸਿੰਘ ਬੜੈਚ, ਡਾਕਟਰ ਗੁਰਵਿੰਦਰ ਸਿੰਘ, ਸੁਖਮਿੰਦਰ ਸਿੰਘ ਹੰਬੜਾ, ਰਣਵੀਰ ਸਿੰਘ ਬੋਪਾਰਾਏ, ਮਹਾਂਵੀਰ ਸਿੰਘ ਪੱਟੀ, ਭਰਪੂਰ ਸਿੰਘ ਸਵੱਦੀ, ਦਿਹਾਤੀ ਮਜ਼ਦੂਰ ਸਭਾ ਵੱਲੋਂ ਕੇਵਲ ਸਿੰਘ ਮੁੱਲਾਪੁਰ, ਲਖਬੀਰ ਸਿੰਘ ਦਾਖਾ ਅਤੇ ਜਥੇਬੰਦੀਆਂ ਦੇ ਲੋਕਲ ਆਗੂਆਂ ਵੱਲੋਂ ਸੁਚਾਰੂ ਸ਼ਲਾਘਾਂਯੋਗ ਭੂਮਿਕਾ ਨਿਭਾਈ ਗਈ। ਰੋਸ ਮਾਰਚ ਦਾ ਹਰ ਪਿੰਡ ਵਿੱਚ ਬਹੁਤ ਭਰਵਾਂ ਸਵਾਗਤ ਕੀਤਾ ਗਿਆ।
Comments
Post a Comment