ਹੜਾਂ ਤੋ ਬਚਾਉ ਹਰ ਖੇਤ ਨੂੰ ਨਹਿਰੀ ਪਾਣੀ ਲਾੳਣ ਲਈ ਪ੍ਰਬੰਧ ਕਰਨ ਦੀ ਕੀਤੀ ਮੰਗ
ਪਟਿਆਲਾ: ਜਮਹੂਰੀ ਕਿਸਾਨ ਸਭਾ ਪੰਜਾਬ ਜ਼ਿਲ੍ਹਾ ਪਟਿਆਲਾ ਦਾ ਵਫ਼ਦ ਅੱਜ ਡਿਪਟੀ ਕਮਿਸ਼ਨਰ ਪਟਿਆਲਾ ਸੌਕਤ ਅਲੀ ਪਰੇ ਨੂੰ ਉਹਨਾਂ ਦੇ ਦਫਤਰ ਵਿੱਚ ਮਿਲਿਆ। ਇਸ ਵਫ਼ਦ ਦੀ ਅਗਵਾਈ ਪੂਰਨ ਚੰਦ ਨਨਹੇੜਾ, ਹਰੀ ਸਿੰਘ ਦੌਣ ਕਲਾਂ, ਮਲਕੀਤ ਸਿੰਘ ਨਿਆਲ ਤੇ ਸੁੱਚਾ ਸਿੰਘ ਕੋਲ ਨੇ ਕੀਤੀ।
ਪ੍ਰੈਸ ਦੇ ਨਾਂ ਬਿਆਨ ਜਾਰੀ ਕਰਦਿਆਂ ਜਥੇਬੰਦੀ ਦੇ ਆਗੂ ਦਰਸ਼ਨ ਬੇਲੂ ਮਾਜਰਾ ਨੇ ਕਿਹਾ ਕਿ ਕਿਸਾਨ ਆਗੂਆਂ ਨੇ ਮਾਨਯੋਗ ਡਿਪਟੀ ਕਮਿਸ਼ਨਰ ਸਾਹਿਬ ਤੋਂ ਮੰਗ ਕੀਤੀ ਹੈ ਕਿ ਪਟਿਆਲਾ ਜ਼ਿਲ੍ਹਾ ਜਿਸ ਵਿੱਚ ਨਹਿਰਾਂ ਦਾ ਵੱਡੇ ਪੱਧਰ ’ਤੇ ਜਾਲ ਵਿਛਿਆ ਹੋਇਆ ਹੈ ਪਰ ਉਹਨਾਂ ਨੂੰ ਲੋੜ ਮੁਤਾਬਕ ਪਾਣੀ ਨਹੀਂ ਮਿਲ ਰਿਹਾ, ਇਸ ਲਈ ਕਿਸਾਨ ਆਗੂਆਂ ਨੇ ਮੰਗ ਕੀਤੀ ਕਿ ਹਰੇਕ ਟੇਲ ’ਤੇ ਨਹਿਰੀ ਪਾਣੀ ਪੁੱਜਦਾ ਕੀਤਾ ਜਾਵੇ ਤੇ ਹਰ ਖੇਤ ਨੂੰ ਨਹਿਰੀ ਪਾਣੀ ਦਿੱਤਾ ਜਾਵੇ, ਬੰਦ ਪਏ ਰਜਵਾਹੇ ਅਤੇ ਖਾਲਾ ਦੁਵਾਰਾ ਤਿਆਰ ਕਰਵਾਈਆਂ ਜਾਣ ਅਤੇ ਹਰੇਕ ਖੇਤ ’ਚ ਪਾਣੀ ਜਾਣ ਲਈ ਸਰਕਾਰ ਆਪਣੇ ਖਰਚੇ ਤੇ ਪਾਇਪ ਲਾਈਨਾਂ ਪਵਾ ਕੇ ਦੇਵੇ।
ਕਿਸਾਨ ਆਗੂਆਂ ਨੇ ਮੰਗ ਕੀਤੀ ਕਿ 1960 - 65 ਦੀ ਮੰਗ ਮੁਤਾਬਕ ਮਿਲਦੇ ਪਾਣੀ ਦਾ ਚਾਰ ਗੁਣਾ ਵਾਧਾ ਕੀਤਾ ਜਾਵੇ ਕਿਉਂਕਿ ਉਸ ਸਮੇ ਸਿਰਫ਼ ਜਿਲ੍ਹੇ ਦੇ ਅੱਧੇ ਰਕਬੇ ਨੂੰ ਨਹਿਰੀ ਪਾਣੀ ਮਿਲਦਾ ਸੀ ਅੱਧਾ ਰਕਬਾ ਟਿੱਬੇ ਤੇ ਟੋਏ ਬਗੇਰਾ ਸਨ ਜੋ ਨਹਿਰੀ ਪਾਣੀ ਦੀ ਪਹੁੰਚ ਤੋਂ ਦੂਰ ਸਨ, ਉਸ ਸਮੇਂ ਫ਼ਸਲਾਂ ਮਿਰਚ, ਕਪਾਹ, ਮੱਕੀ ਤੇ ਮੁੰਗਫ਼ਲੀ ਸਨ ਜੋ ਘੱਟ ਪਾਣੀ ਲੈਦੀਆਂ ਸਨ ਹੁਣ 100% ਰਕਬਾ ਜਿਥੇ ਸਿੰਚਾਈ ਅਧੀਨ ਹੈ ਉਸਦੇ ਨਾਲ ਹੀ ਝੋਨਾ ਤੇ ਕਣਕ ਦੀ ਕਾਸ਼ਤ ਹੋਣ ਕਾਰਨ ਪਾਣੀ ਦੀ ਲੋੜ ਜਿਆਦਾ ਵੱਧ ਗਈ ਹੈ, ਇਸਦੇ ਨਾਲ ਹੀ ਜਿੱਥੇ ਉਹਨਾਂ ਨੇ ਇਹ ਖਦਸ਼ਾ ਜਾਹਿਰ ਕੀਤਾ ਕਿ ਆਉਣ ਵਾਲੇ ਸਮੇਂ ’ਚ ਧਰਤੀ ਹੇਠਲਾ ਪਾਣੀ ਖਤਮ ਹੁੰਦਾ ਜਾ ਰਿਹਾ ਹੈ ਤਾਂ ਨਹਿਰ ਦਾ ਪਾਣੀ ਹਰ ਖੇਤ ਤੱਕ ਪੁੱਜਦਾ ਕਰਨਾ ਅਤੀ ਜਰੂਰੀ ਹੈ ਤਾਂ ਕਿ ਇਸ ਖੇਤੀ ਪ੍ਰਧਾਨ ਸੂਬੇ ਦੀ ਖੇਤੀ ਦੀ ਉਪਜ ਬਰਕਰਾਰ ਰਹਿ ਸਕੇ। ਉਥੇ ਕਿਸਾਨ ਆਗੂਆਂ ਨੇ ਮੰਗ ਕੀਤੀ ਕਿ ਜਿਲ੍ਹੇ ਵਿੱਚੋ ਦੀ ਗੁਜਰਦਾ ਘੱਗਰ ਦਰਿਆ ਜਿੱਥੇ ਕਿਸਾਨਾਂ ਦੀਆਂ ਫਸਲਾਂ ਦਾ ਨੁਕਸਾਨ ਕਰਦਾ ਹੈ ਉਥੇ ਹੋਰ ਲੋਕਾਂ ਦਾ ਵੀ ਭਾਰੀ ਜਾਨੀ ਤੇ ਮਾਲੀ ਨੁਕਸਾਨ ਕਰਦਾ ਹੈ, ਇਸ ਲਈ ਘੱਗਰ ਦੇ ਬੰਨ੍ਹ ਉੱਚੇ ਕਰਕੇ ਇਹਨਾਂ ਨੂੰ ਪੱਕਾ ਕੀਤਾ ਜਾਵੇ। ਬਾਰਸ਼ ਦੇ ਸੀਜ਼ਨ ਤੋਂ ਪਹਿਲਾਂ ਪਟਿਆਲੇ ਜਿਲ੍ਹੇ ਦੇ ਵਿੱਚ ਪੈਂਦੀਆਂ ਨਦੀਆਂ ਨਾਲਿਆ ਅਤੇ ਹੋਰ ਕਈ ਇੱਦਾਂ ਦੇ ਬਰਸਾਤੀ ਨਾਲੇ ਹਨ ਜਿਹੜੇ ਨੁਕਸਾਨ ਕਰਦੇ ਹਨ, ਉਹਨਾਂ ਦੀ ਸਫਾਈ ਬਰਸਾਤੀ ਸੀਜਨ ਤੋਂ ਪਹਿਲਾ ਕਰਾਈ ਜਾਵੇ। ਖਾਸ ਕਰਕੇ ਪੁਲਾਂ ਦੇ ਹੇਠਾਂ ਜੋ ਮਿੱਟੀ ਜਮ੍ਹਾਂ ਹੈ ਉਹ ਪਹਿਲ ਦੇ ਅਧਾਰ ’ਤੇ ਕਢਵਾਈ ਜਾਵੇ, ਨਦੀਆਂ ਨਾਲਿਆ ਦੇ ਕਮਜ਼ੋਰ ਬੰਨ੍ਹ ਮਜ਼ਬੂਤ ਕੀਤੇ ਜਾਣ।
ਅੱਜ ਦੇ ਵਫ਼ਦ ’ਚ ਵਿੱਚ ਹੋਰਨਾਂ ਤੋਂ ਇਲਾਵਾ ਵੱਖ-ਵੱਖ ਕਿਸਾਨ ਆਗੂ ਜਿਨਾਂ ਵਿੱਚ ਅਮਰਜੀਤ ਸਿੰਘ ਘਨੋਰ, ਪ੍ਰਲਾਦ ਸਿੰਘ, ਮਿਸ਼ਰਾ ਸਿੰਘ ਖੇੜੀ ਨਗਾਈਆ, ਚੰਦ ਸਿੰਘ ਨਿਆਲ, ਲਾਭ ਸਿੰਘ, ਬਲੀ ਸਿੰਘ ਨਿਆਲ ਤੇ ਸੁਖਦੇਵ ਸਿੰਘ ਸ਼ਾਮਿਲ ਸਨ, ਜਿਨਾਂ ਨੇ ਕਿਹਾ ਕਿ ਉਹ ਜਿੱਥੇ ਅੱਜ ਡਿਪਟੀ ਕਮਿਸ਼ਨਰ ਸਾਹਿਬ ਨੂੰ ਮੰਗ ਪੱਤਰ ਦੇ ਕੇ ਗਏ ਹਨ ਉਹਨਾਂ ਨੇ ਇਹਨੂੰ ਪਹਿਲ ਦੇ ਅਧਾਰ ’ਤੇ ਹੱਲ ਕਰਨ ਦਾ ਭਰੋਸਾ ਦਵਾਇਆ, ਉਥੇ ਆਉਣ ਵਾਲੇ ਸਮੇਂ ’ਚ ਉਹ ਵੱਖ-ਵੱਖ ਨਿਗਰਾਨ ਇੰਜੀਨੀਅਰਾਂ ਨੂੰ ਮਿਲ ਕੇ ਵੀ ਆਪਣੇ ਮੰਗ ਪੱਤਰ ਦੇਣਗੇ ਅਤੇ ਇਹਨਾਂ ਦੇ ਮਸਲਿਆਂ ਨੂੰ ਹੱਲ ਕਰਾਉਣ ਲਈ ਪੈਰਵੀ ਕਰਨਗੇ ਤਾਂ ਕਿ ਪਟਿਆਲੇ ਜਿਲ੍ਹੇ ਦੇ ਹਰੇਕ ਖੇਤ ਨੂੰ ਜਿੱਥੇ ਪਾਣੀ ਮਿਲੇ ਉਥੇ ਬਰਸਾਤ ਦੇ ਟਾਈਮ ਵਿੱਚ ਪਿਛਲੇ ਸਾਲ ਦੀ ਤਰ੍ਹਾਂ ਪਟਿਆਲੇ ਦੇ ਵਿੱਚ ਹੋਏ ਨੁਕਸਾਨ ਤੋਂ ਬਚਾ ਹੋ ਸਕੇ।
ਕਿਸਾਨੀ ਮੰਗਾਂ ਦੀ ਹਮਾਇਤ ਕਰਦਿਆਂ ਮੁਲਾਜ਼ਮ ਆਗੂ ਗੁਰਦਰਸਨ ਸਿੰਘ ਬੱਲਾਂ, ਲਖਵਿੰਦਰ ਖਾਨਪੁਰ, ਸੁਲੱਖਣ ਸਿੰਘ, ਰਾਜਿੰਦਰ ਧਾਲੀਵਾਲ ਤੇ ਦਵਿੰਦਰ ਗਰੇਵਾਲ ਨੇ ਭਰੋਸਾ ਦਵਾਇਆ ਕਿ ਮੁਲਾਜ਼ਮ ਜਥੇਬੰਦੀ ਵੱਲੋ ਕਿਸਾਨਾਂ ਦੀ ਡਟਵੀ ਹਮਾਇਤ ਕਰਨਗੇ।
Comments
Post a Comment